Blog

Kryetari i Këshillit Kombëtar Shqiptar (KKSh), Enkel Rexhepi, ka reaguar ashpër ndaj deklaratave të fundit të Trupit Koordinues për Preshevë, Bujanoc dhe Medvegjë, duke theksuar se institucioni që ai drejton nuk do të pranojë asnjë lloj presioni apo kushtëzimi politik.

Në reagimin e tij, Rexhepi ka bërë të ditur se Trupi Koordinues kishte premtuar rritje të fondeve për Këshillin Kombëtar Shqiptar, por ky premtim nuk është realizuar. Ai ka zbuluar se përfaqësues të këtij trupi kanë kërkuar heqjen e flamurit kombëtar nga ambientet e KKSh-së si kusht për nënshkrimin e një marrëveshjeje të bashkëpunimit për projektin “Revista Nacionali”.

“Trupi Koordinues ka premtuar rritje të fondeve për KKSh, premtim i cili nuk është realizuar. Pasi nuk e mbajtën fjalën, erdhën në zyrat tona dhe kërkuan nënshkrimin e marrëveshjes me kusht që të hiqet flamuri kombëtar nga institucioni ynë. Kjo është e papranueshme,” – ka deklaruar Rexhepi.

Ai ka theksuar se flamuri kombëtar nuk është objekt negociatash dhe se KKSh nuk do të lejojë asnjë tentativë për ta vënë institucionin në pozitë nënshtrimi për mjete financiare.

“Flamuri ynë nuk negociohet, nuk zëvendësohet dhe nuk hiqet kurrë nga institucioni përfaqësues i shqiptarëve,” – ka shtuar ai.

Rexhepi ka bërë të ditur se Këshilli ka përgatitur të gjitha procedurat për nënshkrimin e marrëveshjes në mënyrë institucionale dhe transparente, ashtu siç është vepruar edhe në të kaluarën, pa spektakël politik dhe pa kushte degradimi.

Në fund të reagimit, kryetari i KKSh-së ka theksuar se ky institucion do të vazhdojë të qëndrojë i hapur për bashkëpunim me çdo palë që respekton dinjitetin dhe barazinë institucionale.

“Bashkëpunimi nënkupton respekt të ndërsjellë, e për këtë lloj bashkëpunimi jemi të gatshëm gjithmonë, me këdo,” – përfundon reagimi i Rexhepit.

Mundësi të reja për të rinjtë shqiptarë nga Lugina

Sot është formalizuar bashkëpunimi mes Komunës së Preshevës dhe Federatës Shqiptare të Futbollit (FSHF), përmes një Memorandumi Bashkëpunimi të nënshkruar në Tiranë. Marrëveshja parasheh hapjen e shtigjeve dhe mundësive të reja për zhvillimin e futbollit në Luginën e Preshevës, veçanërisht për të rinjtë me talent sportiv.

Kryetarja e Komunës së Preshevës, Ardita Sinani, e ka vlerësuar këtë akt si një hap historik që i jep drejtim të ri sportit në komunë.

“Ky bashkëpunim i filluar zyrtarisht sot do ta bëjë Federatën Shqiptare të Futbollit pjesë përbërëse të Luginës. E në një të ardhme, do ta bëjë Luginën pjesë të përhershme të FSHF-së, duke ua mundësuar të rinjve tanë që të mbrojnë ngjyrat e kombëtares sonë,” – ka deklaruar Sinani.

Sipas saj, ky bashkëpunim shënon realizimin e një ëndrre të kahmotshme të shumë të rinjve nga Lugina, të cilët për shkak të kufizimeve të ndryshme nuk kanë pasur mundësi të zhvillohen në nivel kombëtar.

Sinani theksoi gjithashtu se përmes këtij bashkëpunimi po përmbyllet edhe një amanet simbolik i të ndjerit Hasan Kadriu, menaxherit të parë shqiptar në FIFA, duke e cilësuar këtë si një “shpërblim të vonuar, por të merituar për Preshevën”.

Në emër të të rinjve futbollistë, kryetarja Sinani shprehu mirënjohje të veçantë për presidentin e FSHF-së, z. Armando Duka, për mbështetjen dhe prioritetin që i ka dhënë Luginës së Preshevës në politikat e zhvillimit sportiv.

“Memorandumi i nënshkruar sot është vetëm hapi i parë drejt zhvillimit dhe afirmimit të futbollistëve shqiptarë nga Lugina, duke iu siguruar atyre edhe infrastrukturë moderne për futboll,” – shtoi ajo.

Ky bashkëpunim pritet të hapë rrugën për projekte konkrete në ndërtimin e fushave sportive, organizimin e kampeve stërvitore dhe përfshirjen e talenteve të rinj në programet e FSHF-së.

Dallas, SHBA – 23 tetor 2025
Zëvendëskryetari i Komunës së Preshevës dhe kryetar i Partisë Demokratike Shqiptare, gjatë vizitës zyrtare në Shtetet e Bashkuara të Amerikës, njoftoi fillimin e ditës së parë të lobimit të delegacionit nga Lugina e Preshevës për çështjen e rënduar të shqiptarëve në Preshevë, Medvegjë e Bujanoc.

Delegacioni e nisi agjendën e tij në Dallas, ndërsa vizita do të vazhdojë në New York, ku përfaqësuesit e Luginës do të takohen me kongresistë dhe senatorë amerikanë.

“Sot fillon dita e parë e lobimit të delegacionit të Luginës së Preshevës për çështjen e shqiptarëve në Preshevë, Medvegjë e Bujanoc. Para kongresistëve dhe senatorëve amerikanë do të paraqesim me fakte bindëse shkeljet flagrante që po ndodhin ndaj shqiptarëve në këto tri komuna nga shteti i Serbisë,” deklaroi ai.

Ai shtoi se Lugina e Preshevës duhet të përfshihet si prioritet në agjendën e SHBA-ve, ashtu si në të gjitha rastet ku Shtetet e Bashkuara angazhohen për zgjidhjen e krizave në botë.

“Zoti e bekoftë Amerikën. Zoti i bekoftë shqiptarët,” përfundoi zëvendëskryetari i komunës së Preshevës dhe kryetar i PDSH-së.

Më datë 21 tetor 2025, stafi i Bibliotekës “Mehmet Jusufi” realizoi një vizitë zyrtare në Bibliotekën Nacionale “Koço Racin” në Tetovë.
Kjo vizitë vjen si rezultat i ndërtimit të urave të bashkëpunimit ndërmjet dy institucioneve, me synimin për të shkëmbyer përvoja, ide dhe praktika të mira në fushën e bibliotekarisë dhe shërbimeve për lexuesit.

Gjatë takimit, përfaqësuesit e të dyja bibliotekave zhvilluan një shëtitje në ambientet e Bibliotekës Nacionale, duke u njohur nga afër me organizimin e brendshëm, fondin libror, teknologjinë në shërbim të lexuesve, si dhe iniciativat e ndryshme kulturore e edukative që ajo ofron.

U zhvilluan diskutime të frytshme rreth mënyrave për të avancuar bashkëpunimin institucional përmes aktiviteteve të përbashkëta, ekspozitave, promovimeve të librave dhe projekteve që synojnë promovimin e leximit, sidomos tek të rinjtë.

Në shenjë falënderimi dhe respekti për pritjen e ngrohtë, drejtoresha e Bibliotekës “Mehmet Jusufi”, znj. Albina Azizi, i dhuroi drejtorit të Bibliotekës Nacionale “Koço Racin”, z. Binas Pajaziti, një fotografi artistike të qytetit të Preshevës, si simbol të miqësisë dhe bashkëpunimit kulturor ndërmjet dy institucioneve.

Takime të tilla janë të një rëndësie të veçantë, pasi ato jo vetëm që forcojnë lidhjet ndërinstitucionale, por edhe kontribuojnë në zhvillimin profesional të stafit dhe në rritjen e cilësisë së shërbimeve për komunitetin lexues.