Pa koment: Kapitullon ISIS! Të gjithë në gjunjë
Një grup luftëtarësh të të ashtuquajturit Shteti Islamik kërkojnë strehim në kampin e ngritur nga forcat siriane dhe kurde të mbështetura nga Shtetet e Bashkuara të Amerikës, pasi kanë dezertuar nga ushtria e “Kalifatit”.
Vetëm në ditët e fundit më shumë se 400 luftëtarë janë përpjekur të arratisen ndërsa qindra të tjerë vazhdojnë të sundojnë të ashtuquajturin “Kalifat” me burime minimale. Sipas asaj që thonë të kapurit nga forcat siriane dhe kurde që mbështeten nga Shtetet e Bashkuara, pagat e përmuajshme që iu jepeshin luftëtarëve dhe familjeve të tyre janë zëvendësuar me racione me ushqime që bëhen gjithmonë e më të vogla.
Mes militantëve që kanë mbetur ka shumë të huaj, sidomos nga Iraku dhe Azia Qendrore, të cilët fshihen në shpella pranë fshatit Baghouz, buzë lumit Eufrat, pika e fundit nën kontrollin e tyre. Çdo ditë, burra dhe gra largohen prej andej, por i nënshtrohen një kontrolli të imtësishëm nga ana e forcave siriane, disa prej tyre madje sjellin me vete monedha bakri dhe argjendi të krijuara nga ISIS, me shpresën se do të mund t’i përdorin një ditë.
Në pikat e kontrollit, vetëm në 24 orët e fundit, më shumë se 3500 vetë janë larguar nga Baghouz, duke u strehuar në një kamp të sajuar në shkretëtirë. Burrat dhe djemtë që mund të luftojnë ndahen nga gratë dhe vajzat për të verifikuar identitetet e tyre, ndërsa një pjesë e mirë e femrave janë vejusha të luftëtarëve të ISIS të vrarë gjatë luftimeve.
