Sami Salihu: Reciprociteti për letërnjoftime i pengon shqiptarët e Luginës 

Lajm jo të mirë për qytetarët e Luginës, e ka cilësuar Sami Salihu reciprocitetin për letërnjoftime të paralajmëruar nga Kosova për Serbinë.

Salihu, i cili është edhe Kryesues i Asamblesë Komunale në Preshevë, ka thënë se me këtë vendim do të dëmtohen më së shumti shqiptarët që jetojnë në Serbi, sepse për dallim nga serbët që jetojnë në Kosovë, shqiptarët e  Luginës, nuk i kanë dy nënshtetësi.

“Si Luginë, 80.mijë shqiptarë, çdo vendim që forcon sovranitetin, ne padyshim i gëzohemi, Lugina prej kohësh kërkon reciprocitet, por meqenëse po bëhet fjalë për një reciprocitet të parcializuar për letërnjoftime. Mendoj që shqiptarët e Luginës i pengon, për dallim nga serbët që janë të pajisur me dy letërnjoftime, nuk do ta kenë fare problem kalimin, kurse qytetarët do t’i nënshtrohen torturë të plotë për plotësimin e formularëve”, ka thënë ai.

Ai ka thënë, se para se të merrej një vendim i tillë, Qeveria e Kosovës është dashur të diskutojë me banorët e Luginës.

Për shqiptarët e Luginës lexohet si reciprocitet me vetveten, t ‘vetmit që do të pengohen janë shqiptarët e Luginës, kjo do të ja pamundësoj nga shtëpitë e tyre, mendoj që qeveria do duhej paraprakisht të diskutonte me faktorin politik me Luginën e Preshevës, se cila iniciativë që nuk do t’i pengonte qytetarëve. Tani për tani kjo është pengesë për qytetarët e Luginës”, është shprehur Salihu.

Salihu është shprehur se është pro reciprocitetit por jo në kushte kur dëmtohen shqiptarët që jetojnë në Serbi.