Arrestohen në Zvicër dy persona lidhur me sulmin në Vjenë

Një njësi speciale e policisë ka arrestuar sot në Winterthur dy të rinj,  një 18-vjeçar dhe një 24-vjeçar, të dy shtetas zviceranë, raporton Agjencia Zvicerane e lajmeve, SDA.

Ekziston një dyshim për lidhjen midis të arrestuarve dhe atentatorit që ka kryer sulmin në Vjenë në mbrëmjen e të hënës.

Hetimet e policisë kanë çuar në identifikimin e dy personave, ka njoftuar  të martën policia e Kantonit të Cyrihut, transmeton albinfo.ch. Njësia speciale arriti të arrestonte dy personat në Winterthur, në koordinim me autoritetet austriake.

Se deri në çfarë mase kishte një lidhje midis tyre dhe vrasësit të dyshuar nga Vjena është subjekt i sqarimeve të mëtutjeshme.

Autoritetet kanë për qëllim sqarimin e plotë të një përfshirjeje të mundshme në krim të dy personave në fjalë.

Drejtoria e Sigurisë e Cyrihut më parë ka informuar për krijimin e task forcës “Vjena” të policisë së kantonit, përcjell albinfo.ch. Kjo trupë ka për detyrë të kontrollojë nëse ka ndonjë lidhje midis akteve të Vjenës dhe atyre në Kantonin e Cyrihut.

Sulmi terrorist me një prejardhje islamike në Vjenë të hënën në mbrëmje mori katër jetë dhe 22 të plagosur, disa rëndë.