Rexhepi: KKSh ka pranuar mbështetje financiare nga Ambasada e Republikës së Shqipërisë
Këshilli Kombëtar Shqiptar (KKSH) ka marrë mbështetje financiare nga Ambasada e Shqipërisë në Beograd, në kuadër të përkrahjes së projekteve për vitin 2025. Kjo ndihmë vjen si pjesë e angazhimit të Ministrisë për Evropën dhe Punët e Jashtme të Shqipërisë, e cila ka ndërmarrë një hap të rëndësishëm për fuqizimin e komunitetit shqiptar në Luginën e Preshevës dhe më gjerë.
Sipas kryetarit të KKSH-së, Enkel Rexhepi, fondet e siguruara do të përdoren për tre projekte kyçe:
✅ Kursi i gjuhës shqipe për shqiptarët e Sanxhakut
✅ Festivali i Stand-Up Komedisë në Luginë
✅ Ndërgjegjësimi mbi përdorimin e gjuhës shqipe në Luginën e Preshevës
Rexhepi ka falënderuar institucionet shqiptare për këtë përkrahje dhe ka theksuar rëndësinë e këtyre projekteve në ruajtjen dhe promovimin e identitetit kombëtar shqiptar në rajon.
“Më shumë Shqipëri dhe Kosovë në Luginë!” – ka përfunduar ai, duke theksuar nevojën për një qasje më proaktive ndaj sfidave që përballen shqiptarët në këtë zonë.
Ky investim konsiderohet një hap i rëndësishëm në forcimin e pozitës së shqiptarëve në Serbi, sidomos në fushën e arsimit, kulturës dhe të drejtave gjuhësore.
