Rasti i flamurit në shtëpinë e kulturës, reagon kryetari i KKSH-së

Pas inicimit të procedurës gjyqësore ndaj drejtorit të shtëpisë së kulturës në Bujanoc, Jetmir Ismaili, për shkak të përdorimit të simboleve kombëtare, ka reaguar kryetari i KKSH-së, Ragmi Mustafa.
Mustafa duke e dënuar këtë rast është shprehur se „Kjo përbën shkelje flagrante të të drejtave të patjetërsueshme të njeriut dhe jo vetëm të garantuara nga konventat ndërkombëtare po edhe nga vetë kushtetuta e Serbisë „, transmeton FOLonline.

Postimi i plotë i Mustafës:

NGRITJA E PROCEVE GJYQËSORE PËR SHKAK TË PËRDORIMIT TË SIMBOLEVE KOMBËTARE JANË TË MOTIVUARA POLITIKISHT

Ngritja e procesit gjyqësor edhe ndaj drejtorit të “Shtëpisë së Kulturës” në Bujanoc, Jetmir Ismaili, për shkak të përdorimit të simboleve kombëtare në manifestimin “Ditët e Komandant Lleshit” është i pa pranueshëm.
Tashmë është rasti i tretë që kur prokuroria dhe organet e rendit kanë nxitur procese gjyqi për shkak të theksimit të veçorive të identitetit kombëtar dhe ngritjes së flamurit kombëtar gjatë vitit të kaluar.
Kjo përbën shkelje flagrante të të drejtave të patjetërsueshme të njeriut dhe jo vetëm të garantuara nga konventat ndërkombëtare po edhe nga vetë kushtetuta e Serbisë.
Në cilësinë e kryetarit të Këshillit Kombëtar Shqiptar nuk mund t’i vlerësoj ndryshe përveç akte të shëmtuara anti-civilizuese e anti-kushtetuese por edhe të motivuara politikisht në kuadër të një diskursi shqiptarofob gjithnjë në rritje në Serbi.
Kjo politikë në emër të shtetit ligjor është në fakt politikë e dëbimit të tjetrit.
Flamuri kombëtar shqiptar do të valojë në Luginën e Preshevës, e nga përpjekja për të ruajtur e mbrojtur e identitetin e simbolet kombëtare nuk do të zmbrapsemi.