Një ditë pas takimit të zyrtarëve amerikanë me Thaçin e Haradinajn, ambasadori Kosnett jep edhe një porosi
Situata politike aktuale në Kosovë, me taksën e vendosur ndaj Serbisë dhe bllokimin e dialogut të Brukselit, ka bërë që administrata e Shteteve të Bashkuara të Amerikës të fokusojë politikën e saj të jashtme jashtëzakonisht shumë në rajonin e Ballkanit Perëndimor, veçanërisht në zgjidhjen e problemit ndërmjet Kosovës dhe Serbisë.
Në të paktën tri letra zyrtare është kërkuar që të pezullohet taksa ndaj Serbisë, ndërsa presidenti amerikan Donald Trump, në letrat e tij dërguar Thaçit dhe Vuçiqit është shprehur i gatshëm që Amerika të përfshihet në dialogun ndërmjet dy shteteve, shkruan Gazeta Express.
Megjithatë, thirrjet e SHBA-së për heqje të taksës kanë hasur në rezistencën e Ramush Haradinajt, i cili është i bindur që taksa nuk do të hiqet derisa Serbia ta njohë pavarësinë e Republikës së Kosovës.
Për të zhbllokuar situatën, administrata e Trump-it ka dërguar në Kosovë edhe dy zyrtarë të lartë, të cilët mbrëmë kanë takuar Thaçin e Haradinajn, me të cilët kanë biseduar për dialogun me Serbinë dhe taksën.
Haradinaj pas këtij takimi me një deklaratë në profilin e tij në Facebook, ka thënë se mbetet i palëkundur në qëndrime e tij.
E pas këtij takimi, sot edhe ambasadori amerikan Kosnett ka drejtuar një porosi për politikanët kosovarë, përmes një thënie të Martin Luter Kingut.
“Është gjithmonë koha e duhur, për të bërë gjënë e duhur”, ka shkruar Kosnett në llogarinë e tij zyrtare në twitter.
Ai ka thënë se kjo thënie duhet të jetë një përkujtim edhe për politikanët e Kosovës.
Ky mesazh i Kosnett mund të interpretohet si një thirrje për të mos humbur kohë, dhe për t’i marrë vendimet të cilat SHBA-ja po i kërkon prej disa muajsh.
