Në Kosovë diagnostikohet rasti i parë me ethe të minjve
Në Klinikën Infektive në QKUK po trajtohet një 8-vjeçare e infektuar me ethet e minjve.
Fëmija është infektuar në bjeshkët e Deçanit dhe siç ka konfirmuar drejtori i Klinikës Infektive, Arben Vishaj, ajo është në gjendje stabile.
Gjatë ditës Instituti Kombëtar i Shëndetësisë Publike ka apeluar për kujdes gjatë konsumimit të frutave malore për shkak të rrezikut për infektim nga ethet e minjve, që mund të jenë vdekjeprurëse, shkruan kohanet.
Sipas tyre, në Kosovë më së shumti rrezik ka në rajonin e Dukagjinit, rajonin e Karadakut dhe në atë të Shalës.
“Burim i infeksionit janë minjtë. Sëmundja përhapet me ushqim, me aerosolë dhe me kontakt. Rastet me ethe hemorragjike me sindromën renale sporadike janë të palidhura mes vete dhe nuk ka ndonjë shpërthim epidemik mes tyre, por pakujdesia gjatë ruajtjes së ushqimit dhe konsumimi i manave të palara mund të shkaktojnë sëmundje vdekjeprurëse. Në organizmin e njeriut shkaktari hyn përmes tri portave hyrëse: trakti respirator, trakti tretës dhe përmes lëkurës, thuhet në njoftimin e IKSHPK-së”, thuhet në njoftim.
