Memli Krasniqi: Albin Kurti sot dëshmoi se është mashtrues ordiner dhe i rrezikshëm për Kosovën
Nënkryetari i Kuvendit të Kosovës, nga radhët e PDK-së, Memli Krasniqi vlerëson se kryeministri Albin Kurti me paraqitjen e tij në konferencë për letërkëmbimet ndërmjet Qeverisë së Kosovës me NATO-n, u mundua që të manipuloj opinionin publik.
Nëpërmjet një reagimi në faqen e tij në Facebook, Krasniqi ka thënë se “Albin Kurti sot dëshmoi përsëri që, përveç se është mashtrues ordiner, është edhe i rrezikshëm për të tashmen dhe për të ardhmen e shtetit të Kosovës”.
“E vërteta është se Albin Kurti sot bëri edhe një shoë publik, për të zhvendosur vëmendjen prej përgjegjësisë shtetërore që atij i takon për të marrë vendime të rëndësishme e besa edhe të rënda për të ardhmen e Kosovës, e që priten prej tij gjatë këtyre ditëve. Këtu, realisht, temë nuk është raporti i shenjtë Kosovë – NATO, por heqja e taksës dhe vazhdimi i Dialogut Kosovë – Serbi. Albin Kurtit po i harxhohen minutat e mbetur për të përmbushur zotimet që i ka dhënë para partnerëve ndërkombëtar, duke e rrezikuar kështu, mbi të gjitha, marrëdhënien e Kosovës me SHBA-të. Se çfarë do të bëjë e kë do të mashtrojë, do ta shohim këto ditë. Por, përrallat e tij se s’do të heqë taksën e s’do të shkoj në Dialog, pa i përmbushur Serbia kushtet e tij, tashmë kanë vdekur, por s’janë harruar”, ka shkruar Memli Krasniqi.
Deklarata e plotë e Memli Krasniqit:
Albin Kurti sot na dëshmoi përsëri që, përveç se është mashtrues ordiner, është edhe i rrezikshëm për të tashmen dhe për të ardhmen e shtetit të Kosovës. Ai sot, duke u munduar që prapë të manipuloj opinionin publik, publikoi komunikimet zyrtare të Qeverisë së Republikës së Kosovës me NATO-n, me pretendimin se kjo paraqet shkelje të Kushtetutës dhe të interesave shtetërore të Kosovës.
Ku ka paturpësi më të madhe se sa ta vësh në pikëpyetje raportin e Kosovës me NATO-n, kur që nga çlirimi e deri sot, NATO e udhëhequr nga SHBA-të, ka qenë partneri më i rëndësishëm i Kosovës për sigurinë e shtetit tonë. Çfarëdo dakordimi me NATO-n, që konsiderohet agresor e pushtues nga Serbia, nuk mund të jetë cenim i kushtetutshmërisë së Kosovës. Aq më shumë, kur vet Kushtetuta e Republikës së Kosovës dhe vet Deklarata e Pavarësisë i japin NATO-s autorizime të cilat janë ditur e dihen botërisht, për sa i përket sferës së sigurisë në Republikën e Kosovës.
Albin Kurti e di fare mirë se dokumentet e publikuara prej tij as nuk janë sekrete e as nuk përbëjnë kurrfarë risie. Debati për prezencën ose jo të FSK-së në veri, pa autorizimin e NATO-s, ka qenë publik edhe kur është miratuar legjislacioni për Ushtrinë e Kosovës në fund të vitit 2018. Përndryshe, nëse dokumentet paraqesin rrezik dhe janë kundër interesit të Kosovës, siç po ua atribuon Albin Kurti, le t’i shfuqizojë ato që sot, sepse e ka këtë mundësi.
E vërteta është se Albin Kurti sot bëri edhe një shoë publik, për të zhvendosur vëmendjen prej përgjegjësisë shtetërore që atij i takon për të marrë vendime të rëndësishme e besa edhe të rënda për të ardhmen e Kosovës, e që priten prej tij gjatë këtyre ditëve.
Këtu, realisht, temë nuk është raporti i shenjtë Kosovë – NATO, por heqja e taksës dhe vazhdimi i Dialogut Kosovë – Serbi. Albin Kurtit po i harxhohen minutat e mbetur për të përmbushur zotimet që i ka dhënë para partnerëve ndërkombëtar, duke e rrezikuar kështu, mbi të gjitha, marrëdhënien e Kosovës me SHBA-të. Se çfarë do të bëjë e kë do të mashtrojë, do ta shohim këto ditë. Por, përrallat e tij se s’do të heqë taksën e s’do të shkoj në Dialog, pa i përmbushur Serbia kushtet e tij, tashmë kanë vdekur, por s’janë harruar.
Albin Kurti duhet ta kuptojë se më nuk është analist e vrojtues i politikës, por Kryeministër me përgjegjësi shtetërore. Frazeologjia e bukur s’i kryen më punë. Edhe mashtrimet e ulta, si ky sot, nuk i zgjasin më shumë. Qytetarët presin veprime e jo thashetheme prej tij. Por, a ka guxim apo është frikacak, këtë do ta shohin së shpejti të gjithë. E shumë prej atyre që e njohin, e dijnë moti këtë!
