Lidhja Arabe reagon pas vendimit të Kosovës për të hapur ambasadë në Jerusalem

Sekretari i Përgjithshëm i Lidhjes Arabe, Ahmed Aboul Gheit, e ka dënuar sot vendimet që kanë marrë Kosova dhe Serbia, për hapjen e ambasadave të tyre në Jerusalem të Izraelit.

Sipas tij, vendimet e dy shteteve janë të pavlefshme.

Në një deklaratë të dhënë sot, Gheit tha se ky vendim është në kundërshtim me vendimin e Kombeve të Bashkuara, të drejtën ndërkombëtare dhe rezolutën e Këshillit të Sigurimit.

Sipas tij, vendet janë të ndaluara të vendosin ambasada në Jerusalem pasi ky vend cilësohet si i okupuar.

Ndërkohë, Izraeli ka vlerësuar se vendosja e ambasadës së Kosovës dhe Serbisë në Jerusalem përbën hap drejt paqes.

“Ne e shohim vendimin e Kosovës dhe Serbisë, që të vendosin ambasadat e tyre, si hap simbolik drejt promovimit të paqes në mes këtyre shteteve. Qyteti i Jerusalemit, kryeqyteti i përjetshëm i shtetit të Izraelit, do të përbëjë një urë paqeje për tërë botën. I bëj thirrje shteteve të tjera që të ndjekin këto hapa dhe të vendosin ambasadat e tyre në Jerusalem, kryeqytetin e Izraelit”, tha zëdhënësi i Ministrisë së Jashtme izraelite, Gabi Ashkenzi.