Jovanoviq për Srebrenicën: Ndjenjë turpi e zemërimi, politika serbe ta pranojë fajin
Kryetari i Partisë Liberal-Demokrate të Serbisë, Çedomir Jovanoviq, ka folur për gjenocidin serb në Srebrenicë, raportet që ai ka me familjet e viktimave, për të ardhmen e rajonit dhe për tema të tjera.
Jovanoviq thotë se në këtë 24 vjetor të kujtimit të viktimave të masakrës së Srebrenicës ka ndjenja të përziera, mes turpit dhe zemërimit e mirëkuptimit dhe afërsisë me familjet e viktimave.
“Ndjenja të përziera çdo 11 korrik. Ka gjithçka, turp, zemërim, e mirëkuptim dhe ndjenjë afërsie me familjet e viktimave.
Njerëzimi është i obliguar që të ulë kokën, dhe të bashkëndjejë me ata që kanë kaluar nëpër dhimbje për më shumë se dy dekada”, ka thënë Jovanoviq në një intervistë për mediumin boshnajk ‘radiosarajeva’.
Ai ka thënë se është e rëndësishme që politika serbe të jetë e gatshme për të pranuar gabimet.I pyetur se ku e sheh sot Ballkanin përballë Srebrenicës, , Jovanoviq thotë se nuk është shumë i sigurt se njerëzit janë të informuar në mënyrë të detajuar për atë se çfarë ka ndodhur në ish-Jugosllavi.
“Tashmë është një brez krejtësisht i ri, pasi që koha kalon. Ka shumë propagandë, fakte të shtrembëruar në të gjitha anët, lavde për kriminelët e margjinalizim të viktimave”, ka thënë Jovanoviq.
Sipas tij tmerri që kanë kaluar dhe përjetuar dëshmitarët dhe të mbijetuarit e masakrave në Srebrenicë janë dëshmia dhe argumenti më I fortë që gjëra të tilla nuk guxojnë të përsëriten në të ardhmen.
“Kjo është arsyeja pse flas për paqen aq shpesh, sepse e shoh që elitat politike në rajon nuk i kushtojnë vëmendje të mjaftueshme bisedave me njerëzit. Paqja është shumë e nevojshme, dhe absolutisht nuk ka alternativë tjetër”, thekson Jovanoviq, transmeton Gazeta Express.
Në këtë intervistë ai ka folur edhe për takimin që ka pasur me nënën e mbijetuar nga tmerri në Srebrencië, Hatixha Mehmedoviq, duke thënë se asnjëherë nuk do ta harrojë shikimin dhe fjalët e saj.
“Hatixha ishte e gatshme të kërkojë të vërtetën dhe drejtësinë në çdo hap. Unë kurrë nuk do ta harrojë pamjet e saj, fjalët e saj dhe më e rëndësishmja shqetësimin e saj. Brenga e saj është brengë e të gjithë neve, dhe ne nuk duhet të lejojmë edhe një herë tjetër që motrat dhe nënat tona të bëhen heroina të luftës për drejtësi’, ka shtuar Jovanoviq.
Në masakrën e Srebrenciës janë vrarë më shumë se 8000 civilë të pafajshëm, kryesisht burra dhe djem të ri.
Gjithë masakrat dhe vrasjet janë kryer nga forcat paramilitare të drejtuar nga gjenerali famkëkeq Ratko Mlladiq i cili është dënuar nga Tribunali i Hagës me burgim të përjetshëm.
