Ismet Beqiri – LVV-së: Pushteti me dhunë as nuk fitohet dhe as nuk mbahet

Sekretari i përgjithshëm i Lidhjes Demokratike të Kosovës (LDK), Ismet Beqiri, ka reaguar ndaj tendosjes së raporteve mes koalicionit qeverisës pas mocionit të mosbesimit për Qeverinë Kurti, të iniciuar nga LDK-ja, pas shkarkimit të ministrit të Punëve të Brendshme dhe Administratës Publike, Agim Veliu.

Ndërkohë që nesër Kryesia e Kuvendit do të ketë temë të vetme në mbledhjen e saj seancën e jashtëzakonshme për mocionin e mosbesimit për Qeverinë Kurti, Ismet Beqiri, në një postim në Facebook, ka porositur Lëvizjen Vetëvendosje se pushteti mbahet vetëm me partnerë të brendshëm dhe se pushteti nuk fitohet dhe as nuk mbahet me dhunë.

“Sigurisht që po bashkëndiejmë me të gjithë qytetarët tanë, edhe ne me familjet tona po i kalojmë këto ditë të rënda si edhe shumë qytetarë të shteteve të ndryshme nga pandemia Covid-19. Shërim sa më të shpejtë të prekurve nga kjo pandemi. Kësaj gjendje iu shtua edhe kriza politike-qeverisëse, e që LDK me asnjë veprim nuk ka kontribuar për këtë, përkundrazi”, ka thënë mes tjerash Beqiri.

Ai më tej kujtoi kohën e themelimit të LDK-së, duke thënë se ajo “u themelua në vite të rënda, rrugëtuam për 30 vite bashkë për qytetarët tanë dhe me qytetarët tanë”.

“Na linçuan, sulmuan, maltretuan, plagosën e vranë viteve të ‘90-ta, na sulmuan, plagosën dhe vranë edhe pas luftës por nuk u dorëzuam KURRË. Po na linçojnë e sulmojnë edhe tani, emisarë e komisarë brenda dhe jashtë Kosovës, militantë të koordinuar e orkestruar. Kot e kanë, LDK dhe Kosova janë mbi të gjitha. Pushteti mbahet veç me partnerë të brendshëm, e bashkëpunime e partneritet të jashtëm”, thotë Beqiri në këtë postim.

Në fund, ai shton se si në çdo vend demokratik, edhe në Kosovë, “pushteti me dhunë as nuk fitohet dhe as nuk mbahet”.

“Shtëpia pa miq nuk mbahet. Miqësia Kosovë-SHBA e përjetshme”, përfundoi Sekretari i Përgjithshëm i LDK-së, Ismet Beqiri.