Haradinaj i reagon OKB’së: Rusi ishte spiun i kamufluar si punëtor i juaji
Kryeministri Ramush Haradinaj ka shkruar në Facebook, pak kohë pasi Kombet e Bashkuara reaguan për shpalljen e diplomatit rus të UNMIK’ut si person të padëshiruar.
Një zyrtar rus i Misionit të Kombeve të Bashkuara në Kosovë (UNMIK) u arrestua nga Policia e Kosovës të martën gjatë një aksioni në Veri, pasi i njëjti pengoi policët gjatë arrestimit të të dyshuarve për kontrabandë.
Më tej, institucionet kosovare e shpallen person “non grata”, zyrtarin rus që pas lirimit shkoi në Beograd. OKB thotë se nuk mund të shpallen të padëshiruar punonjësit e saj, e Haradinaj nuk zmbrapset nga vendimi.
“Policia e Kosovës gjatë operacionit kundër krimit të organizuar dhe kontrabandës ka arrestuar një qytetar rus, një spiun të kamufluar si punëtor i Organizatës së Kombeve të Bashkuara i cili ka penguar sundimin e ligjit duke përdorur veturën zyrtare të OKB-së”, ka shkruar Haradinaj, transmeton Gazeta Express.
Ai thotë se veprimet e zyrtarit rus në Veri kanë qenë kundër të drejtës ndërkombëtare.
“Veprimet e tij janë kundër së drejtës dhe normave ndërkombëtare. Pengimi i drejtësisë dhe keqpërdorimi i simboleve të OKB-së janë shkelje e rëndë. Misioni i Rusisë pranë OSBE-së duhet ta kuptojë se sundimi i ligjit është përgjegjësi e jona ndaj të gjithë qytetarëve të Kosovës në një shoqëri që ne ndajmë së bashku”, thuhet në postimin e Haradinajt.
