Gazetari Hoxha: Aty ku takova Balilin, nuk punonin pajisjet elektronike!
Gazetari Artan Hoxha ka rrëfyer në emisionin “Opinion” në Tv Klan momentet kur shkoi në fshatin Stjar të Delvinës, aty ku takoi Kelmend Balilin dhe filmoi momentet e vetëdorëzimit në polici.
Hoxha tha se në fshatin Stjar, në zonën ku takoi Balilin, kishte një pajisje që bllokonte të gjitha valët telefonike dhe bllokonte çdo pajisje tjetër elektronike.
“Në momentin që unë kam shkuar gjatë ditës së djeshme, para se t’i afrohesha zonës është bllokuar çdo pajisje elektronike. Aty kishte një pajisje që nxirrte jashtë përdorimit çdo pajisje tjetër. Aty pashë që gjithë pajisjet elektronike ishin jashtë funksionit dhe ne ishim të izoluar nga pjesa tjetër. Në momentin e parë nuk e kam njohur kur e kam takuar. Gjëja e parë që më tha, më ke nxirrë jetën tha, unë jam ai Eskobari. Aty ku e kam intervistuar nuk kam pasur asnjë lloj kontakti“, u shpreh gazetari investigativ.
Artan Hoxha tregon edhe çastet kur Kelmend Balili niset me makinë private drejt pikëtakimit me policinë, ku iu vetëdorëzua drejtorit të Përgjithshëm të Policisë së Shtetit, Ardi Veliu.
“Kam menduar që dorëzimi do bëhej në banesën e itj, por gjëja që vura re është pse nuk erdhi policia ta merrte aty. Ka dalë 2 kilometra nga fshati, kanë devijuar nga rruga nacionale. Për të shmangur vëmendjen e njerëzve, devijoi rrugën nacionale. Janë dy automjete, njëra e Ardi Veliut. Balili zbret nga makina e familjarëve të vet, hipën në makinën ‘Range Rover’ të drejtorit të policisë. Në afërsi të Tiranës, për shkak të prezencës së mediave te Drejtoria e Policisë, kanë devijuar dhe kanë shkuar në Kombinat. Më vonë kur mediat lëvizën drejt Kombinatit, hynë te Drejtoria e Policisë së Tiranës”, deklaroi gazetari Artan Hoxha në “Opinion”.
