Dritan Abazoviç, shqiptari që po e ndryshon Malin e Zi: Ka ardhur koha që rajoni të udhëhiqet nga klasa të reja politike!

Dritan Abazoviç, president i lëvizjes URA në Malin e Zi që në zgjedhjet e 30 gushtit ka siguruar katër mandate deputetësh, do të ketë një rol përcaktues në formimin e qeverisë së re.

Por, gjatë intervistës së dhënë për “Balkan Talks”, për gazetarin Franko Egro, ai shprehet i gatshëm për të sakrifikuar veten për hir të një ndryshimi të prekshëm në vend edhe pse nuk mungojnë propozimet për ta zgjedhur kryeministër.

“Mendoj se nevojitet një qeveri ekspertësh, ku politikanët të punojnë në Parlament. Kryeministër? Mundësi ka por unë mendoj se në këtë qeveri është më mirë me qenë njerëz jashtë politikës”, thotë ai.

“Gjukanoviç në 30 vjet ka ndërtuar një shtet privat dhe çdo gjë ka shkuar në funksion të oligarkëve që kanë qenë afër familjes së tij. Na kanë nën çmuar duke na thënë se nuk e mundim dot, se nuk keni para dhe logjistikë. Por unë gjithmonë e kam besuar dhe kemi ardhur në këtë moment historik. Është hera e parë që në Malin e Zi, pushteti ndryshon në mënyrë demokratike”, thotë ai.

Abazoviç e përjashton plotësisht mundësinë e një bashkëpunimi të mundshëm me partinë e Presidentit Gjukanoviç duke thënë se, ka luftuar gjithmonë kundër tij dhe nuk do t’i shkelë këto parime. Kreu i URA thotë se, forca e tij politike është perëndimore dhe nuk ndryshon qëndrim për pavarësinë e Kosovës.

“Perëndimi i ka dhënë shumë përkrahje dhe Gedafit, Mubarakut dhe Millosheviçit. Perëndimi të përkrah nëse punon në drejtimin e tyre. Kursi jonë është totalisht proevropian dhe pro perëndimor. Nuk ka asnjë ndryshim në politikën e jashtme, qëndrimin ndaj NATO-s apo pavarësisë së Kosovës”, tha ai.

Sipas tij ka ardhur momenti që dhe vendet e tjera në rajon të bëjnë ndryshim në elitat politike, pasi vetëm ato mund të sjellin zhvillim pozitiv

Abazoviç nuk i kursen kritikat për partitë etnike shqiptare në Malin e Zi duke theksuar se i kanë shërbyer pushtetit të Gjukanoniç në një kohë kur ky i fundit ka qeverisur kundër interesave të shqiptarëve. Pavarësisht kësaj ai bën apel që dy deputetët shqiptarë të përfshihen në qeveri.

“Dy deputetët shqiptarë duhet të integrohen në qeverinë e re. Ata deri tani nuk kanë punuar për të mirën e popullit të vet, por kanë punuar vetëm në mbështetje të Gjukanoviç. Në regjistrimin e popullsisë në 2003, shqiptarët kanë qenë 7%, në 2011, 4.9%. Për 20 vjet nëse do të vazhdohej me këtë politikë, nuk do të kishte më shqiptarë në Malin e Zi.

Për krijimin e Komunës së Tuzit në 2015, partia e Gjukanoviç ka votuar kundër dhe ne si opozitë kemi votuar pro. Komuna e Ulqinit është e vetmja komunë e varfër bregdetare në vend. Pse nuk kthehen pronat e shqiptarëve? Për çfarë politike flasim në favor të shqiptarëve?”, tha ai.

Kreu i URA nuk bie dakord as me qëndrimin e mbajtur nga Tirana zyrtare në prag të procesit zgjedhor, duke theksuar se kryeministri, Edi Rama dëmtoi interesat e shqiptarëve.

“Podgorica nga Tirana është vetëm 200 km larg por nuk po mundemi me u kuptu. A është në rregull me dal Edi Rama me përkrah Gjukanoviçin? A mendoni se është normale me përkrah dikën që na ka shti në diskriminim. E kam lexu si në shpullë të madhe partive shqiptare. Për shumicën e liderëve në Ballkan nuk e kam një mendim të mirë, dhe këtu nuk kam për Ramën. Duhet të vijnë njerëz që të fusin një vlerë të re”, tha Abazoviç.

I pyetur se sa është e vërtetë deklarata për heroin kombëtar, Skënderbeun, Abazoviç thotë se, mbiemri i ka ndryshuar gjatë periudhës së komunizmit, ndërsa origjinën e ka nga një fshat në Krujë me emrin Abazaj dhe nuk ka kurrsesi mundësi që të mos e dinte origjinën e Gjergj Kastriotit.