Aktorja preshevare Egzona Salihu pjesë e filmit “Dita e Gruas”
Në Republikën e Maqedonisë Veriore kanë filluar xhirimet për filmin e ri të metrazhit të gjatë “Dita e Gruas”, një bashkëpunim shqiptaro – maqedon, nën regjinë e Goce Cvetanovskin dhe producent Driton Ramadani
Filmi “Dita e Gruas” për temë ka problemin e viktimave të trafikimit njerëzorë që përfundojnë në rrjet prostitucioni, rrjet të cilin një ish gazetar mundohet ta zbulojë.
“Fokusi i tregimit është në trafikimin e qenieve njerëzore dhe prostitucionit të detyruar” ka thënë regjisori i filmit, Goce Cvetanovski për InaOnline. Cvetanovski nuk dëshiron që të jap shumë detaje mbi filmin.
Rolin kryesor të këtij filmi e luan aktorja Sladjana Vujosevic, kurse me rolet e tyre do të përfshihen edhe aktori i njohur shqiptarë, Avni Dalipi, aktorët e Teatrit të Kumanovës, Musa Isufi e Ismail Kasumi si dhe aktorja e Teatrit të Preshevës, Egzona Salihu.
“Unë e luaj rrolin e Joanës, një vajze shqiptare nga Shqipëria, e cila është trafikuar në territorin e Maqedonisë Veriore për të punuar në prostitucion, derisa përmes meje një ish gazetar mundohet ta zbuloj rrjetën e trafikimit.” shprehet Egzona Salihu në lidhje me rolin e saj, ekskluzivisht për PreshevaPRESS.
Filmi “Dita e Gruas” do të realizohet me përfshirjen e tri gjuhëve: shqip, maqedonisht dhe anglisht, ndërsa xhirimet do të realizohen në Shkup dhe Kumanovë.
Egzona Salihu, e cila momentalisht punon si aktore e Teatrit të Preshevës, pas roleve të shumta nëpër shfaqe dhe seriale televizive në Kosovë, thot se nuk ka qenë e lehtë të përshtatet me karakterin e Joanës, por bashkëpunimi i mirë me aktorët dhe ekipin realizues të filmit e ka lehtësuar.
“Normalisht nuk ka qenë leht të luash karakterin e Joanës, por përmes një bashkëpunimi shumë të mirë me regjisorin Cvetanovski, e gjithashru me të gjithë në ekipin e filmit, besoj që po arrijë të e realizoj në menyrë të shkëlqyeshme. Unë jam shumë e lumtur dhe mirënjohëse që jam pjesë e këtij projekti me një produksion dhe ekip shumë profesional.” shprehet Egzona për PreshevaPRESS, duke mos treguar detaje të tjera rreth filmit.
Edhe pse xhirimet kanë filluar me vonesë për shkak të situatës me pandeminë Covif19, filmi “Dita e Gruas” pritet të finalizohet me kohē dhe të shfaqet për publikun në fillim të vitit 2021.
