Trump: Dua gjykim të menjëhershëm
Presidenti i Shteteve të Bashkuara, Donald Trump, kërkoi gjykim të menjëhershëm në Senat, pasi Dhoma e Përfaqësuesve votoi të mërkurën për shkarkimin e tij.
Trumpi u akuzua për abuzim të pushtetit dhe pengim të punës së Kongresit.
Rasti tani duhet të kalojë në Senat dhe ligjvënësit atje duhet të vendosin për largimin ose jo të presidentit nga detyra.
Senati kontrollohet nga Partia Republikane e Trumpit dhe gjasat për shkarkimin e tij shihen si tejet të vogla.
Megjithatë, demokratët, që kanë shumicën në Dhomën e Përfaqësuesve, kanë refuzuar deri më tash ta çojnë rastin në Senat, duke thënë se ky institucion nuk i lejon dëshmitë e dëshmitarëve dhe se, në këtë mënyrë, nuk do të mbajë gjykim të drejtë.
Në një seri të postimeve në Twitter, Trumpi tha se demokratët nuk duan gjykim, sepse “rasti i tyre është shumë i keq”.
“Ata kanë zero prova”, tha Trumpi.
Udhëheqësi i shumicës republikane në Senat, Mitch McConnell, ka thënë më herët se procesi në Senat mund të zhvillohet pa dëshmitarë.
Për çfarë akuzohet Trumpi?
Trumpi akuzohet se i ka bërë presion Ukrainës për të zbuluar informacione të dëmshme për Joe Bidenin, i cili mund të jetë rival i tij në zgjedhjet e vitit 2020, dhe djalin e tij Hunter.
Hunteri ka punuar për një kompani ukrainase, kur Joe Biden ka qenë nënpresident i SHBA-së.
Në këmbim të favoreve nga Ukraina, Trumpi akuzohet se ka mbajtur dy gjëra pezull: ndihmën ushtarake për Ukrainën, në vlerë prej 400 milionëdollarësh, dhe një takim në Shtëpinë e Bardhë me presidentin ukrainas
Me këto veprime, sipas demokratëve, Trumpi ka abuzuar me pushtetin, pasi ka përdorur zyrën e presidentit për përfitime politike personale dhe në dëm të sigurisë kombëtare.
Trumpi akuzohet edhe për pengim të punës së Kongresit, pasi ka refuzuar të bashkëpunojë në hetime./Rel
