Shqipërisë po i ikën “truri”, në 8 vitet e fundit janë larguar 369 mijë qytetarë
Shqipëria për fat të keq po përballet vitet e fundit me një “hemorragji” sociale, ku një numër i madh qytetarësh kanë zgjedhur të lënë vendin dhe të nisin jetën e tyre në një vend tjetër, si për shembull në Gjermani dhe në Francë. Ata duket që po lënë Shqipërinë me shpresën se diku jashtë do të gjejnë atë çfarë iu ka munguar në vendin ku janë lindur e rritur.
Sipas Institutit të Statistikave në Shqipëri (INSTAT), gjatë vitit 2018 emigruan mbi 38 mijë shqiptarë. Përgjatë viteve 2011-2017 janë larguar nga vendi 330 mijë persona. Në total, për këto tetë vite janë 369 mijë qytetare të larguar. Largimi bëhet me një ritëm prej 46 mijë personash në vit, raporton Euronews.al.
Emigracioni po lë pasoja të ndjeshme demografike, sociale dhe ekonomike. Ai po prodhon boshatisje të vendit, rëndim te skemës së pensioneve, plakje të popullsisë dhe ulje të numrit të lindjeve, ngaqë ata që largohen nga vendi janë përgjithësisht në moshë të re.
Largimi i profesionistëve si inxhinierë, mjekë, punonjës të teknologjisë së informacionit, infermierë, mësues krijon vakume që nuk mund të plotësohen kollaj. Kjo jo vetëm prej investimit të gjatë ndaj profesionistëve të fushës, por sepse këto janë profesione që kanë ndikim të drejtpërdrejtë në shoqërinë dhe ekonominë e një shteti.
Braktisja kërkon ndërmarrjen e veprimeve urgjente nga qeveria dhe klasa politike, duke e kufizuar këtë dukuri me politika zhvillimi dhe rritjen e pagave shtetërore për inteligjencën, të paktën nga korriku 2020. Rritja e pagave prej 7 për qind për të punësuarit në shëndetësi nuk po e ndalon boshatisjen e spitaleve.
Ndërkohë Ambasada Gjermane në Tiranë njoftoi qytetarët të bëjnë kujdes kur aplikojnë për vizë pune në Gjermani, për të mos rënë pre e sekserëve që premtojnë lehtësira në aplikim, kundrejt parave. Aplikimi bëhet i gjithi me e-mail dhe pa pagesë. Janë me mijëra ata që po mendojnë të shkojnë për punë në Gjermani ose Francë.
