PVD i thot “JO” ofertës së PDSH-së për udhëheqjen e komunës me rotacion
Partia për Veprim Demokratik ka dalur me komunikatë rreth zhvillimeve të fundit politike në Preshevë.
PVD iu është përgjigjur me “jo” ofertës së PDSH-së për të bashkëqeverisur komunën e Preshevës me rotacion. Në komunikatën e saj PVD është treguar e prerë që nuk ështê e interesuar për ndarjen e mandatit tê kryetarit të komunës por verëm për mandat të plotë 4 vjeçar, transmeton Ministria e Lajmeve.
Më poshtë mund ta lexoni komunikatën e plotë të PVD-së ;
PRESHEVA KA NEVOJË PËR QEVERISJE TË MIRË NGA OPOZITA, JO PËR ARRNIM PUSHTETI PËRMES PARIMIT TË ROTACIONIT
Mbrëmë, në mbledhjen e saj të kryesisë dhe këshilltarëve të dalur nga zgjedhjet e fundit të parakohshme lokale, Partia për Veprim Demokratik nuk e ka mbështetur propozimin e Partisë Demokratike Shqiptare, për ndarjen e mandatit të kryetarit të Komunës me parimin e rotacionit.
Parimi i rotacionit ku ndahet mandati i të njëjtit funksion midis përfaqësuesve të partive të ndryshme është praktikë e dëshmuar si joefikase në përformansë qeverisëse.
Partia për Veprim Demokratik mbetet e bindur dhe e vendosur se nuk mund të kemi qeverisje më të mirë me mendësi dhe metoda të vjetëra.
Shqiprim Arifi është dëshmia më e mirë se ndryshimi nuk sjell përparim dhe zhvillim nëse nuk shoqërohet me qeverisje më të mirë.
Sot është momenti që ndryshimin ta bëjmë edhe duke ndërtuar qeverisje të mirë, e jo vetëm ta sajojmë të ndryshmen përmes rotacionit të emrave të tjerë në pushtetin e njëjtë.
Komuna e Preshevës ka nevojë për qeverisje reformatore që bën shkëputjen me të tashmën dhe të kaluarën, por edhe që ndërton shpresë dhe mundësi për të ardhmen.
Ky është vullneti i shumicës i qytetarëve që votuan në zgjedhjet e fundit për partitë opozitare shqiptare. Qytetarët thanë se duan pushtet tjetër, por edhe më të mirë. Qytetarët kërkuan Shqiprim Arifin dhe Listën Serbe në opozitë, si dhe opozitën e sotme në pushtet.
Në përputhje dhe në respekt të këtij vullneti popullor, Partia për Veprim Demokratik mbetet e përkushtuar për arritjen e marrëveshjes bashkëqeverisëse me Partinë Demokratike Shqiptare, Lëvizjen për Reforma dhe Unionin Demokratik Shqiptar.
