Omicron: Evropa rikthen masat antiCovid

Liderët evropianë janë duke i rikthyer masat ndaj koronavirusit për shkak të shpërndarjes së mëtejme e të shpejtë të variantit Omicron.

Gjermania e Portugalia janë ndër vendet që kanë njoftuar për masa shtesë në periudhën e festave të fundvitit.

Omicroni është bërë varianti dominues në shumë shtete evropiane.

Shpërthimi do të shtyjë sistemet shëndetësore drejt kolapsit, ka paralajmëruar shefi i Organizatës Botërore të Shëndetësisë në Evropë. Hans Kluge ka paralajmëruar se “një stuhi e re” po vjen dhe qeveritë duhet të bëhen gati për të pritur rritjet e rasteve.

Gjermania ka njoftuar se nga 28 dhjetori do të limitojë mbledhjet private deri në 10 persona e se klubet e natës do të mbyllen. Ndeshjet e futbollit nga ajo datë do të zhvillohen pa tifozë.

“Koronavirusi s’ka pushim”, ka thënë kancelari Olaf Scholz. “S’mundemi – dhe s’duhet – t’i mbyllim sytë para valës së re, që ka nisur të vijë”.

Ndërkaq Portugalia do të mbyllë gastronominë nga 26 dhjetori dhe do të bëjë të detyrueshme punën nga shtëpia deri më 9 janar. Tubimet e jashtme do të limitohen në 10 persona.

Kafenetë do të mbyllen edhe në Finlandë nga 24 dhjetori me orar të caktuar e për tri javë do të kenë edhe hapësirë të caktuar që mund të shfrytëzohet. Udhëtarët nga zona Schengen duhet të tregojnë testin negativ për COVID-19.

Në Britaninë e Madhe, kryeministri Boris Johnson, ka përjashtuar mbylljet para Krishtlindjeve, por Skocia, Uellsi dhe Irlanda Veriore tashmë kanë marrë masa.

Në Suedi, gastronomia do të shërbejë vetëm për ata që janë të ulur dhe do të kërkojë punë nga shtëpia, për ata që munden.

Holanda ka kthyer mbylljet nga e hëna.

Evropa ka regjistruar më shumë se 89 milionë raste dhe 1.5 milionë raste të vdekjes nga COVID-19, sipas të dhënave të fundit të BE-së.

Omicron u regjistrua fillimisht në Afrikë, por është shpërndarë shpejt në gjithë botën. Të dhënat kanë treguar se ai është më infektues, por s’ka pasur dëshmi nëse shkakton telashe më të mëdha shëndetësore.

Është vënë re në 38 nga 53 shtetet e rajonit evropian të OBSH-së.