Nuk ndalet Kurti: Kësaj radhe ankohet tek Komiteti për Punë të Jashtme i Parlamentit Europian për veprimet e Thaçit

Ka tre muaj që kryeministri në detyrë, Albin Kurti ka tentuar të komunikojë me zyrtarë të shteteve të ndryshme përmes letrave, për veprimet e presidentit, Hashim Thaçi që prej rrëzimit të Qeverisë me mocion mosbesimi në Kuvend, ende nuk ka marrë ndonjë përgjigje, përjashto përgjigjen e Komisionit të Venecias, shkruan Insajderi.

E së fundmi, Kurti iu është drejtuar me një letër edhe Komitetit për Punë të Jashtme të Parlamentit Evropian.

Në këtë letër shkruan se presidenti Thaçi, i mbështetur nga disa parti po tentojnë realizimin e një skenari antikushtetues.

“Me ndërmarrjen e iniciativës së tij për ta formuar Qeverinë, duke keqinterpretuar kërkesat e fituesit të zgjedhjeve për sqarime mbi bazën kushtetuese rreth veprimeve e tij, dhe duke shpikur një afat që nuk parashikohet askund në Kushtetutë, presidenti ka vepruar qartë duke shkelur Kushtetutën e Republikës së Kosovës”, shkruan në letrën e Kurtit, të cilën e ka publikuar KOHA, përcjell Insajderi.

Në Zyrën e kryeministrit thonë se letërkëmbimet janë në kuadër të komunikimit të rregullt që mbajnë me shtetet partnere, që prej zgjedhjes së Qeverisë.

“Në disa prej to ne kemi shprehur qëndrimet tona mbi çështje të rëndësisë nacionale, sikurse është dialogu me Serbinë. Njoftimi i shteteve partnere mbi qëndrimet zyrtare të Qeverisë së Republikës së Kosovës është praktikë krejt e zakontë, e cila madje është detyrim. Qëllimi i këtyre letrave, përpos mirëmbajtjes së komunikimit me ta, është mirinformimi i partnerëve tanë mbi punën e Qeverisë së Republikës së Kosovës, qëndrimet zyrtare të saj sa u përket çështjeve me interes të veçantë, por edhe informimi mbi zhvillimet politike dhe institucionale në vend. Për ne është tejet e rëndësishme, por edhe kërkohet ashtu që për punën e Qeverisë dhe çështjeve që ndërlidhen me fushëveprimin e saj partnerët tanë të njoftohen drejtpërdrejt nga ne”, ka thënë zëdhënësi, në një përgjigje me shkrim për KOHËN.

Kurti i ka dërguar letër edhe zëvendëspresidentit amerikan, Mike Pence, por të cilën nuk e ka bërë publike.

Pas raportimit të mediave, Kurti javën e kaluar e ka mohuar se i është ankuar Penceit, në lidhje me rolin e ambasadorit Richard Grenell në bisedimet Kosovë – Serbi.

Sipas tij, letra është e para një muaji dhe se nuk ka të bëjë me ankesë, por me sqarim të pozicionit të Qeverisë në lidhje me dialogun