Marrëveshja KOSTT-ENTSO, Hajdari: Kosova fiton pavarësi energjetike

Ministrja në detyrë e Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike (MEPTINIS), Rozeta Hajdari ka bërë të ditur se sot ka përfunduar procesi i votimit për marrëveshjen e re KOSTT- ENTSO –E, me të cilën, sipas saj, vendi ynë fiton pavarësi energjetike. Marrëveshjen e kanë vlerësuar si një arritje të madhe edhe Ambasada gjermane në Prishtinë, kryeministri në detyrë, Albin Kurti, lideri i PDK-së, Kadri Veseli dhe lideri i AAK-së Ramush Haradinaj.

Marrëveshja është miratuar nga Grupi Regjional i Evropës Kontinentale- RGCE) dhe tash pritet nënshkrimi i saj.

Hajdari përmes një shkrimi në Facebook, ka falënderuar Gjermaninë, SHBA dhe vendet e tjera mike.

“Sot më 20 prill 2020, në ora 17:00, ka përfunduar procesi i votimit për Marrëveshjen e Re të Kyçjes KOSTT- ENTSO –E. Marrëveshja e Re është miratuar nga RGCE (Grupi Regjional i Evropës Kontinentale). Me votimin e sotëm dhe nënshkrimin që do të pasojë, të Marrëveshjes së Re të Kyçjes ndërmjet KOSTT dhe ENTSO-E, KOSTT dhe Republika e Kosovës fitojnë pavarësinë energjetike, për të cilën është punuar disa vite me radhë. Me këtë rast falënderojmë Gjermaninë me partnerët, SHBA dhe vendet tjera MIKE. Njëherit përgëzojmë KOSTT për këtë arritje të jashtëzakonshme! Urime Kosovë në këtë kohë të vështirë me Pandeminë COVID -19 por me SUKSESE HISTORIKE”, ka shkruar ajo.

Arritjen e marrëveshjes KOSTT – ENTSO e ka përshëndetur edhe Ambasada gjermane në Kosovë.

Ambasada e Gjermanisë thekson se marrëveshja është moment historik për Kosovën.

“Marrëveshja e kyçjes më në fund mundëson krijimin e një zone të pavarur të kontrollit për Kosovën, ky është një moment historik për Kosovën dhe për bashkëpunimin në rajon. Ky është rezultati i një rruge të gjatë në të cilën Gjermania qëndronte përherë në krah të qeverive dhe institucioneve kosovare”, thuhet në njoftimin e ambasadës gjermane.

Marrëveshjen e kanë vlerësuar si një arritje të madhe edhe a kryeministri në detyrë, Albin Kurti, lideri i PDK-së, Kadri Veseli dhe lideri i AAK-së Ramush Haradinaj.

Kryeministri në detyrë i Kosovës, Albin Kurti, ka përshëndetur e kyçjen e Operatorin e Sistemit, Transmisionit dhe Tregut të energjisë elektrike të Republikës së Kosovës (KOSTT) në Sistemet e Transmisionit të Evropës (që operojnë brenda asociacionit ENTSO-E).

Kurti, përmes një postimi në Facebook, ka thënë se Kjo marrëveshje e re do të mundësojë operimin si një bllok i vetëm energjetik midis Kosovës dhe Shqipërisë. Interkonjeksioni, linja 400Kv midis nesh do të funksionalizohet. Për ndërtimin e saj ndihmoi e investoi mbi 75 milionë euro Qeveria Gjermane nëpërmjet KfW. Por prej më shumë se 6 vitesh kjo linjë nuk mund të funksionalizohej.

Ish-kryeministri, Ramush Haradinaj ka mirëpritur marrëveshjen e re të kyçjes në mes KOSTT – ENTSO-E, nga Grupi Regjional i Evropës, përmes së cilës i mundësohet Kosovës pavarësia energjetike nga Serbia dhe Operimi i pavarur si Zonë Rregulluese, brenda Bllokut Rregullues Kosovë-Shqipëri.

Haradinaj përmes një shkrimi në Facebook ka shkruar se për dy vite sa ishte kryeministër ka punuar që të arrihet kjo marrëveshje, transmeton Telegrafi.

Kryetari i PDK-së, Kadri Veseli, e ka vlerësuar si hap shumë të rëndësishëm për Republikën e Kosovës, anëtarësimin e Operatorit të Sistemit, Transmisionit dhe Tregut (KOSTT) në Rrjetin Evropian të Operatorëve të Sistemit të Transmisionit të Energjisë (ENTSO –E).