Kurti reagon për vrasjen e 18 vjeçares në Ferizaj, kërkon që dorasi sa më shpejt të dalë para drejtësisë

Kryeministri i Kosovës, Albin Kurti, ka reaguar në lidhje me vrasjen e një 18 vjecareje në qytetin e Ferizajt, ku të dyshuar janë dy persona, përcjell KosovaPost.

Kurti ka kërkuar që sa më shpejt të vihet para drejtësisë vrasësi teksa ka inkurajuar të gjitha femrat që të raportojnë rastet e dhunës në institucionet e sigurisë. Ai po ashtu ka kërkuar nga prindërit që të edukojnë djemtë e tyre se dhuna nuk është zgjidhje.

“Një 18 vjeçareje dje iu ndalën përgjithmonë dëshirat dhe ëndrrat.  Ajo nuk e humbi jetën në aksident trafiku apo konflikt lufte. Jeta e saj u shua dhunshëm në mjedisin ku çdo njëri nga ne duhet të ndihet i dashur, i respektuar e mbi të gjitha i mbrojtur. Kosova nuk ka jetë grash dhe vajzash për të humbur. Na duhet angazhim maksimal i institucioneve dhe çdo njërit nga ne për të respektuar te drejtën për të gëzuar jetën, për ta jetuar atë dinjitetshëm  dhe për të realizuar aspiratat legjitime”, ka shkruar ai duke potencuar të drejtën e qytetarëve të Kosovës që të jetojnë dinjitetshëm.

“Nëna dhe baballarë, vëllezër dhe motra, mësues dhe mësuese, zyrtarë të rendit dhe të mbrojtjes së ligjit, qytetarë dhe qytetare të Kosovës, Ta ndalim dhunën ndaj grave, t’i edukojmë bijtë e vëllezërit tanë se dhuna nuk është gjuhë e pranueshme komunikimi, se dhuna është turp që sjellë tragjedi dhe se është e dënueshme me ligj”, shtoi Kurti.

“Kërkoj nga organet e rendit dhe të hetuesisë që ta vënë vrasësin e dyshuar të Marigonës sa më shpejtë para drejtësisë. U bëj thirrje të gjitha nënave, bashkëshorteve, motrave e vajzave, që të lajmërojnë në polici rastet e dhunës, si edhe mosveprimin institucional për rastet e lajmëruara. Mos heshtni! Ne nuk mund të jemi spektatorë ndaj të ardhmes sonë. Kemi obligim moral, kushtetues, institucional që të mbrojmë jetën dhe dinjitetin e secilës viktimë të dhunës në familje”, përfundoi Kurti.