Kurti për 4 korrikun: Shteti i Kosovës dhe kombi shqiptar i bashkohen sot festës së popullit dhe institucioneve të SHBA-ve
Lideri i Lëvizjes Vetëvendosje, Albin Kurti, e ka uruar popullin amerikan me rastin e 244 vjetorit të pavarësisë së Shteteve të Bashkuara të Amerikës, shkruan KP
Tutje ka shkruar Kurti në Facebook, se shteti i Kosovës dhe kombi shqiptar i bashkohen sot festës së popullit dhe institucioneve të SHBA-ve.
“Para 244 vitesh u shpall pavarësia e SHBA-ve nga Anglia perandorake. U bashkuan 13 koloni për t’u çliruar duke shënuar në histori kalimin nga monarkia e sundimi në republikë dhe demokraci. Barazia dhe të drejtat e njeriut siç i mendojmë sot e kanë burimin nga ajo kohë që nuk rreshti së frymëzuari popuj e lëvizje anembanë globit për liri e drejtësi. Deklarata e Pavarësisë së SHBA-ve është pararendëse e Deklaratës Universale për të Drejtat e Njeriut. Revolucioni amerikan është pararendës i anti-kolonializmit në botë”, ka shkruar Kurti në Facebook.
Lideri Kurti, shprehet falënderues për mbështetjen e SHBA-së në arritjet e Kosovës.
“Mirënjohës e falënderues për rolin e pazëvendësueshëm në arritjet tona, shteti i Kosovës dhe kombi shqiptar i bashkohen sot festës së popullit dhe institucioneve të SHBA-ve”, ka shkruar Kurti.
