Këshilli Evropian miratoi 100 milionë euro për Kosovën
100 milionë euro janë miratuar për Kosovën nga Këshilli Evropian të mërkuren, në kuadër të një pakoje ndihmash në shumë prej tre miliardë eurosh, për ndihmë e shteteve kandidate të BE-së dhe fqinjve në Partneritetin Lindor dhe Jugor, e propozuar më parë nga Komisioni Evropian.
Paratë nga i ashtuquajturi “Instrumenti i Financimit të Shpejtë” janë të destinuara për ekonomitë e dhjetë vendeve, me qëllim që t’i ndihmojnë ata të përballen me pasojat ekonomike të pandemisë COVID-19.
Ndihma financiare do të ofrohet në formën e huave nga Fondi Monetar Ndërkombëtar, në kushte të favorshme.
Nga kjo shumë, 100 milionë euro janë ndarë për Kosovën, 60 milionë euro për Malin e Zi, 160 milionë euro për Maqedoninë Veriore, 250 milionë për Bosnjën dhe 180 milionë euro për Shqipërinë.
Paratë janë planifikuar gjithashtu të ndihmojnë edhe shtete tjera, kështu që 150 milionë euro janë të destinuara për Gjeorgjinë, 200 milionë për Jordaninë, 100 milion për Moldavinë, 600 milionë për Tunizinë dhe 1.2 miliard euro për Ukrainën.
Ndihma e BE nga ky program do t’u shërbejë vendeve që e kanë pranuar të mbulojnë kërkesat shtesë financiare që u krijuan për shkak të shpërthimit të pandemisë së koronavirusit, dhe ai do të jetë në dispozicion të tyre në 12 muajt e ardhshëm.
“Këto fonde do të kontribuojnë në forcimin e stabilitetit makroekonomik dhe krijimin e hapësirës për drejtimin e burimeve për mbrojtjen e qytetarëve dhe zbutjen e pasojave negative socio-ekonomike të pandemisë”, shkruhet në njoftimin e Këshillit Evropian.
