Fshehu cigare në një kazan bojleri 80 litrash: Parandalohet kontrabanda në pikën kufitare të Preshevës
Më 3 janar, në pikën kufitare të Preshevës, doganierët në bashkëpunim me Policinë Kufitare parandaluan një përpjekje kontrabande të cigareve. Gjatë kontrollit të detajuar të një automjeti, u zbuluan 410 pako cigaresh të markave të ndryshme, të fshehura brenda një ngrohësi uji (kazani) prej 80 litrash.
Sipas njoftimit të Administratës Doganore, shoferi kishte deklaruar se në bagazh po transportonte një ngrohës uji të ri. Dyshimet e doganierëve çuan në një kontroll të thelluar, gjatë të cilit u konstatua se kazani ishte përdorur për fshehjen e mallrave të kontrabanduara.
Cigaret e zbuluara janë konfiskuar përfundimisht me vendim gjykate, ndërsa pasagjeri është gjobitur për veprën penale të kryer. Autoritetet theksojnë se kontrollet e shtuara në pikat kufitare do të vazhdojnë me qëllim parandalimin e kontrabandës dhe mbrojtjen e tregut të ligjshëm.
