COVID-19/ Franca iu rrit pagat stafeve mjekësore

Franca miratoi rritje të pagave, në vlerë prej 8 miliardë eurosh, për stafet mjekësore, të cilët janë lavdëuar për rolin e tyre në luftimin e koronavirusit.

Marrëveshja u nënshkrua të hënën vonë midis qeverisë dhe sindikatave të punëtorëve, pas disa javësh negociata. Në bazë të saj, paga do të rritet për 183 euro në muaj.

Stafet mjekësore në Francë janë lavdëruar gjatë gjithë kohës së pandemisë së koronavirusit, me shfaqje të rregullta të vlerësimit të publikut.

Më herët, stafet mjekësore kanë zhvilluar protesta për të kërkuar rritje të pagave dhe fonde më të mira për spitalet.

“Ky është një moment historik për sistemin tonë shëndetësor”, tha kryeministri i Francës, Jean Castex, pas nënshkrimit të marrëveshjes për rritje pagash.

“Kjo është, para së gjithash, mirënjohje për ata që kanë qenë në vijën e parë të frontit kundër pandemisë”, shtoi ai.