Ambasadori rus: Ndryshimi i kufijve Kosovë – Serbi është ide e zyrtarëve amerikanë
Ambasadori i Rusisë në Tiranë ka komentuar idenë e ndryshimit të kufijve mes Kosovës dhe Serbisë, në kuadër të një marrëveshjeje gjithëpërfshirëse për paqe mes dy vendeve. Ai ka thënë se korrigjimi i kufijve është projekt amerikan.
Korrigjimi i kufijve mes Kosovës dhe Serbisë është një prej temave më të nxehta të rajonit, por edhe më gjerë, pasi për të po komentohet në disa shtete europiane.
I pyetur për qëndrimin e diplomacisë ruse në lidhje me këtë, ambasadori rus në Tiranë, Aleksandër Karpushin, tha se rusët nuk kanë folur ndonjëherë për këtë temë.
“Nuk e kam shumë të qartë se përse ju më kërkoni mua, përfaqësuesit të Rusisë, të komentoj një ide e cila promovohet nga zyrtarë amerikanë. Siç mund ta mbani mend, fillimisht, në gusht 2018, për zbatimin e mundshëm të këtij skenari ka folur këshilltari i Presidentit Trump për sigurinë kombëtare John Bolton, ndërkohë që më pas, në fillim të marsit 2019, për këtë ka folur Zv.Ndihmës Sekretari i Shtetit Mattheë Palmer”, u shpreh ambasadori rus në Tiranë, në A2 CNN.
“Nga ana tjetër, nuk ka pasur asnjë rast të vetëm që udhëheqësit rusë të kenë folur për rishikimin e kufijve në rajon. Rusia i mbështet plotësisht bisedimet aktuale midis Beogradit dhe Prishtinës. Presidenti Putin ka theksuar disa herë që vendi ynë është i gatshëm të pranojë çdo zgjidhje reciprokisht të pranueshme që palët do të arrijnë përmes dialogut dhe në përputhje me rezolutën 1244 të Këshillit të Sigurimit të OKB-së. Deri më sot nuk kemi dëgjuar asnjë njoftim zyrtar që do të konfirmonte që palët po e shqyrtojnë ndryshimin e kufijve si një opsion të përshtatshëm për zgjidhjen e situatës”, shtoi ai.
