65 milionë euro efekti i masës 100% për produktet që vijnë nga Serbia dhe BeH
Efekti i vendimit të Qeverisë së Kosovës për rritjen e taksës 100 përqind ndaj mallrave me origjinë nga Serbia dhe Bosnja e Hercegovina është mbi 65 milionë euro.
Kështu ka thënë drejtori i Doganës së Kosovës, Bahri Berisha në një intervistë, ku ka njoftuar se importi nga këto dy vende ka shënuar rënie të mëdha. Pavarësisht këtij vendimi, Berisha ka thënë se bazuar në projeksionet e qeverisë për vitin 2018, Dogana ka arritur të përmbush planin e të hyrave sipas trendeve në fushën e importeve.
Duke folur për ndikimet e taksës ndaj mallrave të Serbisë dhe Bosnjës, Berisha ka thënë se 8 deri 10 milionë euro është vlera e mallrave më pak të importuara nga BeH.
Dogana e Kosovës pas vendimit të Qeverisë ka rritë nivelin e kontrollit për mundësinë e kontrabandës së mallrave me akcizë në pjesën veriore të Kosovës, por sipas Berishës prapë mbetet sfidues, sepse në këtë kohë rrjetet e krimit të organizuar tentojnë të përfitojnë prej kësaj mase.
