Osmani sapo shkarkoi djalin e Haxhi Shalës
U.Dsë Presidentit të Kosovës, Vjosa Osmani ka vendosur të shfuqizojë katër dekretet për konsuj të përgjithshëm në Pragë, Lubjanë, Shkup e Tiranë.
Osmani këto hapa i ka ndërmarrë këtë vendim duke u bazuar në praktikën diplomatike ku nuk hapen konsujt e përgjithshëm ku emërohen Ambasada, thuhet në komunikatë për media.
Në mesin e të shkarkuarve është edhe djali i deputetit Haxhi Shala, i cili u emërua Konsull i Përgjithshëm në Pragë.
Emërimi i Flakron Shalës në postin e konsullit, nxiti reagime të shumta të opozitës e shoqërisë civile.
Ky është njoftimi i plotë i lëshuar nga Presidenca:
Në përputhje me përgjegjësitë e saj kushtetuese si dhe bazuar në praktikat diplomatike e konsullore, u.d. Presidentja, dr.Vjosa Osmani-Sadriu sot ka shfuqizuar katër dekrete për konsuj të përgjithshëm, konkretisht për konsujt e përgjithshëm në Pragë, Lubjanë, Shkup dhe Tiranë.
Sa i përket tri rasteve të para, bazuar në praktikën diplomatike e konsullore, konsullatat e përgjithshme, si rregull, nuk hapen dhe konsujt e përgjithshëm nuk emërohen në të njëjtin qytet ku ndodhet edhe Ambasada. Për më tepër, bazuar në informatat që na janë dërguar, për këta konsuj të përgjithshëm nuk kishte ekzekuaturë/pëlqim nga shteti pritës. Ndërkaq, sa i përket rastit të katërt, atij të konsullit në Tiranë, u.d. Presidentja Osmani ka vendosur ta shfuqizojë dekretin për emërimin e konsullit të përgjithshëm, në përputhje me propozimin e Ministrisë së Punëve të Jashtme, propozim ky i cili nuk ishte marrë për bazë nga Presidenti paraprak.
Si udhëheqëse e politikës së jashtme, u.d. Presidentja është e përkushtuar që të mbrojë ligjshmërinë dhe profesionalizmin përgjatë emërimeve në shërbimin e jashtëm. Ajo do të vazhdojë të insistojë, që të mos tejkalohet kuota e emërimeve politike, e paraparë me Ligjin për Ministrinë e Punëve të Jashtme dhe Shërbimin Diplomatik, dhe që emërimet të bëhen nga radhët e diplomatëve të karrierës.
