Macroni refuzon ta dënojë ripublikimin e karikaturave të profetit Muhamed

Presidenti francez, Emmanuel Macron të mërkurën ka refuzuar ta dënojë vendimin e revistës satirike, “Charlie Hebdo” për ripublikimin e karikaturave të profetit Muhamed.

Ai ka thënë se kurrë “nuk do të merret me vlerësimin e vendimeve të një gazetari”, duke iu referuar lirisë së shtypit dhe lirisë së shprehjes.

Ai e ka dënuar gjuhën e urrejtjes, por ka thënë se ajo nuk vlen për karikaturat e “Charlie Hebdos”.

“Vizatimet nuk janë gjuhë e urrejtjes”, ka thënë Macron.

Macron ka folur gjatë një vizite në Bejrut, në prag të gjykimit në Paris të 13 personave të akuzuar për sulm në zyrat e Charlie Hebdos, më 2015.