Familja Jashari kundër idesë së Lajçakut: Ajo që duhet të ndryshojë Kushtetutën e saj është Serbia, e jo Kosova
Kryetari i Komunës së Skenderajt Bekim Jashari, ka thënë se është Serbia ajo që duhet të ndryshojë Kushtetutën e saj, e jo Kosova, siç ka kërkuar emisari i BE-së për dialogun Miroslav Lajçak, për formimin e Asociacionit të Komunave me Shumicë serbe.
Jashari ka thënë se Kosova nuk duhet për asnjë çmim të ndryshojë Kushtetutën në emër të arritjes së marrëveshjes përfundimtare me Serbinë.
Ai ka theksuar se Kushtetuta e Kosovës, duhet të ndryshohet vetëm për të hequr votimin e dyfishtë, si derivat i pakos së Ahtisarit.
Përfaqësuesi i familjes Jashari, ka kërkuar unitet të spektrit politik në vend, që të mbrohet shteti nga tendencat për kompromise të dhimbshme dhe prekje të territorit.
Reagimi i tij i plotë në Facebook:
Në asnjë mënyrë dhe për asnjë çmim nuk duhet dhe nuk mund të ndryshohet Kushtetuta e Republikës së Kosovës, në emër të arritjes së marrëveshjes përfundimtare me Serbinë. Shteti ynë ka bërë vazhdimisht kompromise të dhimbshme në emër të arritjes së marrëveshjeve me Serbinë, duke përfshirë diskriminimin pozitiv të pakicës serbe në Kosovë dhe votimin e dyfishtë për çështje substanciale si pjesë e kushtetutës sonë. Ajo që duhet të ndryshojë kushtetutën është Serbia, e cila përveç kësaj duhet dhënë përgjegjësi për të pagjeturit, viktimat e luftës, gjenocidin mbi popullatën e pafajshme dhe dëmet materiale të shkaktuara në luftën e fundit në Kosovë. Kushtetuta e shtetit tonë duhet të ndryshohet vetëm për të hequr votimin e dyfishtë, si derivat i pakos së Ahtisarit dhe i cili pengon të ardhmen dhe zhvillimin e shtetit tonë. Udhëheqësit tonë shtetërorë duhet t’ia bëjnë me dije faktorit ndërkombëtar që shteti ynë nuk ka për të bërë më kompromise dhe se jemi shteti më i avancuar në Ballkan sa i përket respektimit të të drejtave të pakicave. Është koha e fundit që spektri politik në vend të jenë të bashkuar dhe të unifikuar të mbrojmë shtetin tonë nga çdo tendencë që mund të vijë për ta futur atë në negociata e kompromise të dhimbshme. Çdo veprim i sotëm i udhëheqësve tanë duhet të jetë konform Kushtetutës dhe duke mos prekur në asnjë mënyrë shtetësinë, sovranitetin dhe territorialitetin e shtetit tonë.
