Kryeministri i Republika Srpska, Radovan Viskoviq, jep dorëheqjen

Radovan Viskoviq, kryeministri i entitetit Republika Srpska në Bosnjë dhe Hercegovinë, ka dhënë dorëheqjen nga posti i tij. Lajmi u bë i ditur sot, duke shënuar fundin e mandatit të tij që nisi në vitin 2018.

Viskoviq është anëtar i Aleancës së Social Demokratëve të Pavarur (SNSD), partia e udhëhequr nga presidenti i RS-së, Milorad Dodik. Gjatë qeverisjes së tij, opozita e ka kritikuar shpesh për menaxhimin e burimeve të entitetit dhe për qasjen e ashpër ndaj institucioneve shtetërore të Bosnjës dhe Hercegovinës.

Në korrik të vitit 2023, Shtetet e Bashkuara e vendosën Viskoviqin në listën e sanksioneve për kërcënim ndaj Marrëveshjes së Dejtonit dhe shkelje të sovranitetit të Bosnjës. Sipas Uashingtonit, ai ka promovuar ligje në Asamblenë Popullore të RS-së që shpallnin të pazbatueshme vendimet e Gjykatës Kushtetuese të Bosnjës, duke penguar zbatimin e marrëveshjes së paqes.

Sanksionet përfshijnë ndalim hyrjeje në SHBA dhe ngrirje të aseteve që ndodhen nën juridiksion amerikan.

Viskoviq është gjithashtu nën hetim nga Prokuroria e Bosnjës për prishje të rendit kushtetues. Për të njëjtin rast janë të dyshuar edhe presidenti Milorad Dodik dhe kryetari i parlamentit të RS-së, Nenad Stevandiq.

Dorëheqja e tij pritet të hapë rrugën për emërimin e një kryeministri të ri, ndërsa zhvillimet e ardhshme do të përcaktojnë drejtimin politik të entitetit.

Burimi Radio Evropa e Lirë