Sllovenia do të kërkojë certifikatën e Covid-19 edhe për ata që kalojnë tranzit

Duke pasur parasysh rritjen kohëve të fundit të infeksioneve me variantin Delta në vendet e BE -së, Sllovenia ka vendosur të shtrëngojë masat e koronës, shkruan srf.ch.

Sipas agjencisë sllovene të lajmeve STA, qeveria në Lubjanë ka raportuar se po ndodh “një përkeqësim i situatës epidemiologjike”.

Që nga 23 gusht, njerëzit që do të kalojnë nëpër Slloveni do të lejohen të hyjnë në vend vetëm me paraqitjen e dëshmisë së imunitetit ose një certifikate testimi, transmeton albinfo.ch.

Aktualisht, një gjë e tillë vlen vetëm për turistët që qëndrojnë në vend për më shumë se dymbëdhjetë orë.

Në të njëjtën kohë, punonjësit në sektorë të caktuar të punës, të cilët nuk janë të vaksinuar kundër koronës janë të detyruar të kryejnë teste më të shpeshta të koronës: çdo 48 orë për teste të shpejta dhe çdo 72 orë për teste PCR.

Aktualisht është ende në fuqi paraqitja e testit në bazë javore. Të prekur nga ndryshimi më i ri do të jenë punonjësit në sektorin e hotelierisë, infermierisë dhe kujdesit shëndetësor si dhe shoferët e taksive.