Eurodeputetët thirrje BE-së për heqjen e vizave për Kosovën

Komiteti i Punëve të Jashtme i Parlamentit Evropian miratoi sot një raport për Ballkanin Perëndimor, i cili kërkon përfshirje më të fortë të Bashkimit Evropian në vendet e Ballkanit Perëndimor, vazhdimin e financimit të vendeve kandidate dhe konfirmimin se procesi i pranimit ka për qëllim anëtarësimin e plotë në BE.

Deputetët e Komitetit për Politikë të Jashtme të Parlamentit Evropian i kanë bërë thirrje BE-së që ta sigurojë liberalizimin e vizave për Kosovën sa më shpejt të jetë e mundur.

Ky komitet, përmes takimit të zhvilluar përmes video-konferencës, ka vlerësuar se hapja e dyerve për anëtarësimin e shteteve të Ballkanit në Bashkimin Evropian është në vetë interesin politik, të sigurisë dhe atë ekonomik të bllokut evropian.

“BE-ja duhet të sigurojë që metodologjia ne saj e zgjerimit t’i mbështesë reformat dhe qëndrueshmërinë e qëllimit të anëtarësimit të barabartë për shtetet kandidate”, sipas konkluzave të deputetëve të atij Komiteti, theksohet në kumtesën e Parlamentit Evropian.

Po ashtu rekomandohet që BE të angazhohet më shumë në vendet e Ballkanit Perëndimor, të ndihmojë në luftën kundër korrupsionit dhe të promovojë bashkëpunimin rajonal, dhe të sigurojë fonde të përshtatshme para pranimit që do të përfitojnë qytetarët e vendeve të Ballkanit Perëndimor./Telegrafi/