Austria lehtëson masat e izolimit, hap dyqanet e vogla dhe parqet

Qeveria austriake do të lejojë një lehtësim të masave të izolimit, të marra për të ngadalësuar përhapjen e koronavirusit. Kancelari i Austrisë, Sebastian Kurz, i tha kombit se festimet e Ditës së Pashkëve kishin përjetim ekuivalent me “ringjalljen”, raporton The Guardian, transmeton lajmi.net.

Dyqaneve të vogla, parqeve publike, vetëshërbimeve dhe qendrave të kopshtarisë iu dha leja të hapen të martën në mëngjes pasi u mbyllën për gati një muaj. Por, austriakët duhet të respektojnë masat e rrepta distancuese, si dhe të vendosin maska.

Gjobat në vend prej 25 € mund t’u jepen atyre që shkelin rregullat.

Kurz tha se vendi ishte “në rrugën e duhur”. Ai tha se shkalla e infeksioneve po binte në nivelin e duhur, dhe falënderoi austriakët për disiplinën e treguar.

“Tani po marrim hapat e parë drejt normalitetit”, shtoi tutje kancelari austriak.

Austria, e cila ka pak më pak se 8.9 milion banorë, është pare në Gjermani si një shembull për t’u ndjekur në trajtimin e koronavirusit, për shkak të shkallës relativisht të ulët të vdekjes, e cila të martën ishte 384 dhe me më shumë se 14 mijë të infektuar.

Austria po lejon hapjen e dyqaneve prej 400 metrash katrorë, por me vetëm një klient për çdo 20 metra katrorë. Dyqanet mund të hapen nga 07:00-19:00.