Lavrov: Rusia e di mirë si do t‘i përgjigjemi kërcënimeve të NATO-s

Ministri i Jashtëm i Rusisë, Sergey Lavrov, duke theskuar se NATO po përpiqet të vendosë dominim mbi botën, tha se vendi i tij e di se si do t’i përgjigjet kërcënimeve të NATO-s.

Lavrov iu përgjigj pyetjeve të gazetarëve pas takimit të 26-të të Këshillit Ministror të OSBE-së në kryeqytetin e Sllovakisë, Bratisllavë.

“NATO e shikon veten saj si burim legjitimiteti dhe përpiqet që t‘i bindë të gjithë se vetëm ajo mund ta ndërmarrë këtë rol. NATO po zgjeron infratrukturën e saj ushtarake drejt kufirit të Rusisë”, tha Lavrov duke shprehur shqetësime për veprimet e NATO-s.

Ai theksoi se NATO ka rritur buxhetin e saj në fushën ushtarake.

“NATO po përpiqet të krijojë dominim mbi botën, përfshirë Evropën, Atlantikun dhe Lindjen e Mesme. NATO dëshiron të eliminojë të gjithë rivalët e saj duke prishur balancën e Rusisë dhe Kinës. Ne e dimë mirë se si do t‘i përgjigjemi kërcënimeve të NATO-s pa hyrë në garën e armatosjes dhe duke garantuar sigurinë tonë”, komentoi Lavrov.

Ndër të tjera, Lavrov vlerësoi edhe vendimin e NATO-s për përdorimin e hapësirës si fushë të re operacionale, duke theksuar se duhet të ndiqen rezolutat e Kombeve të Bashkuara lidhur me garantimin e sigurisë.

Më tej, Lavrov bëri koment edhe për diplomatët rusë në ambasadën ruse në Berlin, që u dëbuan në lidhje me vrasjen e një personi me nënshtetësi ruse dhe gjeorgjiane në Gjermani.

“Ne kemi kanale për të mbajtur kontakte lidhur me shkeljen e legjislacionit të të dy vendeve. Këto kanale duhet të përdoren”, tha ministri rus.

“Unë nuk e di se në çfarë bazohen partnerët tanë gjermanë lidhur me mendimin e tyre se Rusia nuk po bashkëpunon në mënyrë të mjaftueshme. Në këtë mënyrë nuk duhet të flitet me askënd”, shtoi kryediplomati rus Lavrov.